Ә.Х. Марғұлан атындағы Археология институтының Батыс Қазақстан филиалы
22 Қан 2024
Батыс Қазақстан филиалы 2023 жылдың 29 қыркүйегінде Ә.Х. Марғұлан атындағы Археология институтының бас директорының шешімімен құрылды.
Филиалдың негізгі мақсаты – ежелгі дәуірдегі мәдениет пен тарихи үдерістерді зерттеу бағытында теңгерімді саясатты жүзеге асыру арқылы Батыс Қазақстанда археология мен археологиялық ғылымның ғылыми әлеуетін дамыту.
Филиал өз қызметінде төрт облыстың (Ақтөбе, Атырау, Батыс Қазақстан және Маңғыстау) археологтарының ғылыми әлеуетін біріктіруді, аймақтағы зерттеулерді жаңа деңгейге көтеруді және тарихи-мәдени мұраны зерттеу, сақтау және насихаттаумен айналысатын жоғары оқу орындары, облыстық өлкетану мұражайлары және басқа да ғылыми ұйымдардың жұмысын үйлестіруді жүзеге асырады.
Филиалдың ғылыми бағыттарының бірі – палеолит дәуірінен бастап қазіргі уақытқа дейінгі археологиялық мәдениеттер мен ескерткіштерді кешенді зерттеу негізінде Батыс Қазақстан аумағындағы тарихи үдерістің заңдылықтарын зерттеу болып табылады. Сонымен қатар, филиал қызметкерлері жергілікті археологтар мен басқа да мамандарды, оның ішінде колледждер мен жоғары оқу орындарының студенттерін дайындаумен белсенді айналысады.
Қызмет ету кезеңінде филиал қызметкерлері «Елек I кездейсоқ табылған материалдар негізінде 2-4 ғасырдағы ғұнның киімін, қару-жарағын және ат әбзелдерін ғылыми-көркем және табиғи реконструкциялау», «Қазақстан Республикасының тарих және мәдениет ескерткіштерінің жинағы. Ақтөбе облысы. 1-шығарылым. Қарғалы ауданы», «Қазақстандағы ғұн дәуірі ескерткіштерін кешенді зерттеу», «Сармат ескерткіштерін зерттеу (Ақтөбе облысы, Мұғалжар ауданы)» сияқты жобаларды әзірлеу мен іске асыруға қатысты.
Сонымен қатар филиал өз қызметінде «Ақтөбе облысының мәдени-тарихи мұрасын зерттеу, жаңғырту мен насихаттаудың өзекті мәселелері», «Марғұлан оқулары – 2023», «Қазақстан археологиялық мұрасын зерттеу мен сақтаудың өзекті мәселелері», «Азияның шығысы: аймақтың тарихи-мәдени мұрасын зерттеу және сақтау мәселелері», «Ескерткіш – ел тарихы», «Ұлы қоныс аудару қарсаңындағы дала тайпалары» сияқты халықаралық дөңгелек үстелдер, көрмелер, конференциялар ұйымдастырды және оларға қатысылды.
Филиал қызметкерлері жас ғалымдар-студенттердің ғылыми жұмыстарына жетекшілік жасап, мектептер мен колледждерде дәрістер өткізді.