Ұлттық музейде белгілі археолог, академик Жәкен Таймағамбетовтың мерейтойына орай конференция өтеді
09 Жел 2023
2023 жылғы 14 желтоқсан күні сағат 10:00-де Қазақстан Республикасы Мәдениет және ақпарат министрлігінің қолдауымен Ұлттық музейде археолог, ҚР Ұлттық музейінің жетекші ғылыми қызметкері, ҚР Ұлттық Ғылым академиясының академигі, ҚР және РФ тарих ғылымдарының докторы, профессор, ҚР еңбек сіңірген қайраткері Жәкен Таймағамбетовтың 70 жасқа толуына орай «Жәкен Таймағамбетов және Еуразия палеолитінің мәселелері» атты ғылыми-практикалық конференция өтеді.
Академик Жәкен Таймағамбетов Орталық Азиядағы палеолит дәуірі мен Еуразияның ежелгі тарихын жетекші зерттеушілерінің бірі. Оның көпқырлы ғылыми қызметінің басым бағыттары – археологияның іргелі мәселелері: Еуразиядағы алғашқы адамдардың қоныстануы, олардың материалдық мәдениеті, көші-қон және этникалық байланыстары, табиғи ортамен өзара әрекеттесуі. Археолог Ж.Қ.Таймағамбетов – Қазақстанның түрлі өңірлерінде 300-ден астам палеолит ескерткіштерін ашқан, Қазақстан аумағында алғашқы адамның шамамен 1 млн. жыл бұрын пайда болғанын ғылыми дәлелдеген. Ол көптен бері елдегі тас дәуірінің ескерткіштерін зерттеуге арналған түрлі халықаралық археологиялық экспедицияларға тұрақты түрде жетекшілік етіп келеді. Профессор Жәкен Қожахметұлы – ЮНЕСКО бойынша бірқатар шетелдік конференциялардың қатысушысы, әлемнің түрлі тілдеріне аударылған көптеген ғылыми еңбектердің авторы.
Конференция жұмысы 2 секциядан тұрады:
1. «Еуразия палеолитінің мәселелері»;
2. «Ғылымдағы өмір: Таймағамбетов Ж.К. және экспедициялар».
Секциялар жұмысы барысында тас дәуірінің әртүрлі теориялық және әдіснамалық мәселелері, Қазақстанның ғана емес, жалпы Еуразияның палеолит дәуірін зерттеудегі жаңа жетістіктері қарастырылып, археологтар, тарихшылар, ғалымның шәкірттері мен достары мерейтой иесіне қатысты естеліктерімен бөліседі.
Конференцияға қатысу үшін Испания, АҚШ, Германия, Франция, Канада, Австрия, Польша, Жапония, Моңғолия, Ресей, Қырғызстан, Тәжікстан және Қазақстаннан өтінімдер мен баяндамалар келіп түсті.
Конференция аясында РҒА СБ археология және этнография институты, ҚР Ұлттық музейінің Ә.Х.Марғұлан атындағы Археология институты, Әл-Фараби атындағы Қазақ ұлттық университетімен бірлесіп дайындаған 4 кітап таныстырылады:
1. «Жәкен Таймағамбетов және Еуразия палеолитінің проблемалары» Халықаралық ғылыми-практикалық конференция жинағы;
2. Академик Жәкен Қожахметұлы Таймағамбетовтың биобиблиографиясы;
3. Биобиблиографиялық көрсеткіш: Жәкен Қожахметұлы Таймағамбетов;
4. Ж.К.Таймағамбетовтың БАҚ-тағы еңбектерінің библиографиялық жинағы. Отандық және шетелдік баспасөз беттеріндегі мақалалары (2014-2023 жж.).
Конференцияға қатысушылардың назарына «ҚР ҰҒА академигі Ж.К. Таймағамбетовтың ғылыми жолының кезеңдері» атты көрме ұсынылады. Көрмеге ғалымның монографиялары, оқулықтары, оқу құралдары, ғылыми мақалалары, сондай-ақ соңғы жылдары табылған палеолит тұрақтарының артефактілері қойылады.
Осыған дейін Жәкен Таймағамбетов экспедициясы туралы толықметражды фильм түсіріп үлгерген BBC телерадиокомпаниясының өкілдері мерейтойлық іс-шараларға келіп, түсірілім жасауды жоспарлап отыр.