Қытайдағы ғылыми миссия: қорытынды кездесулер және ынтымақтастықтың жаңа бағыттары
26 Қар 2025
Ә.Х. Марғұлан атындағы Археология институты делегациясының Ганьсу, Үрімжі және Сиань қалаларын қамтыған жұмыс сапары Ордос пен Хохоттағы қорытынды кездесулермен аяқталды. Бұл іс-сапар ғылыми бағдарламаның заңды жалғасы болып, кәсіби байланыстарды кеңейтуге, ғылыми алмасуды тереңдетуге және Қытайдың солтүстік өңірлеріндегі жетекші археологиялық орталықтармен танысуға мүмкіндіктер ашты.
18 қараша күні Институт мамандары Ордос қаласындағы Өнер және тарих музейінде болды. Заманауи архитектуралық шешіммен салынған және техникалық тұрғыдан жақсы жабдықталған музей мамандарға «ордос қола бұйымдары» деп аталатын бірегей коллекциямен жан-жақты танысуға мүмкіндік берді. Бұл көне өнер туындылары жоғары көркемдік құндылыққа ие, әрі Еуразия далалық белдеуіндегі халықтардың мәдениеті, қару-жарақ эволюциясы, ат әбзелдері және көркемдік дәстүрлері жөнінде аса маңызды дерек көзі болып табылады.
Коллекциядағы материалдар Дала өңірі, Моңғолия және Солтүстік Қытай тұрғындарының ежелгі мәдени байланыстарын айқын көрсетеді.
Кездесу барысында музей мен Ә.Х. Марғұлан атындағы Археология институты арасында ынтымақтастық туралы меморандум әзірлеу жөнінде келісімге келді. Институт кітапханасы музейдің қола бұйымдары жинағына арналған құнды басылыммен толықты. Бұл қадам кешенді зерттеулерді бірлесіп жүргізу үшін жаңа мүмкіндіктер ашады.
19 қарашада делегация өз жұмысын Ішкі Моңғолия астанасы – Хохот қаласында жұмысын жалғастырды. Ішкі Моңғолия университетінде өткен семинарда аймақтың археологиялық зерттеулері, әдістемелік тәсілдері және алдағы бірлескен жұмыстардың ықтимал формалары талқыланды. Екі тарап та ғылыми алмасуды кеңейтуге және ортақ бастамаларды дамытуға мүдделі екендігін көрсетті.
Сол күні делегация Ішкі Моңғолия музейіне барды. Музей экспозициялары мен қор коллекциялары өңірдің далалық мәдениеттерінің тарихын, соның ішінде түркі дәуіріне қатысты маңызды материалдарды толық қамтиды. Музей мамандарымен болған пікір алмасу барысында түркі кезеңіне арналған археологиялық жарияланымдарды аудару, талдау және жүйелеу бойынша ортақ жұмыс тобын құрудың өзектілігі атап өтілді.
Ордос пен Хохоттағы кездесулер Қытайға жасалған кең көлемді ғылыми сапардың соңғы бөлімі болды. Делегация Қытайдың озық археологиялық және реставрациялық әдістерімен, негізгі музей және зертханалық инфрақұрылымымен танысты, сондай-ақ кәсіби байланыстарды едәуір нығайтты. Алынған деректер, тәжірибе алмасу және жасалған келісімдер Еуразия археологиясы саласындағы болашақ бірлескен жобалар мен ұзақ мерзімді ынтымақтастық үшін берік негіз қалыптастырады.
