Ганьсу археологиялық маршруттары: жаңа деректер және кәсіби ынтымақтастық
26 Қар 2025
Үрімжіде өткен кездесулер мен семинарлар аяқталғаннан кейін делегацияның жұмыс бағдарламасы Ганьсу провинциясында жалғасты. Мұнда ғылыми өзара іс-қимылды кеңейтуге және далалық әрі музейлік зерттеу әдістерін зерделеуге бағытталған кезекті танымдық іс-шаралар ұйымдастырылды.
14 қарашада делегация Чжанцзячуань уезінде орналасқан Арбалар музейінің жұмысымен танысты. Кездесу барысында музей қорындағы археологиялық материалдардың хронологиялық ауқымы, арбалардың құрылымдық ерекшеліктері мен модификациялары, олардың таралу аймағы және жасалу технологиялары таныстырылды. Сонымен қатар жылқыны арбаға жегу құралдарының типологиясы мен қолданылуы талданып, олардың тиісті дәуірдегі көлік және әскери жүйелердің эволюциясын зерттеуге мүмкіндік берді. Бұл мәліметтер Орталық Азия аумағындағы ұқсас материалдармен салыстыру жүргізуге негіз бола алады.
15 қарашада делегация Ганьсу провинциясындағы неолит дәуірінің Наньцзо ескерткішіндегі стационарлық қазба жұмыстарымен және осы объектіні ғылыми қамтумен айналысатын зерттеу базасының инфрақұрылымымен танысты. Талқылау барысында қазба жүргізудің әдістемелік тәсілдері, ескерткішті табиғи эрозиядан сақтау мәселелері, аналитикалық зерттеулердің бағыттары мен олардың алдын ала нәтижелері, сондай-ақ археологиялық материалдарды консервациялау әдістері қарастырылды.
Осы күні делегация Нинсянь уезіндегі Юйцунь ескерткішімен байланысты археологиялық базаға да барды. Мұнда қорғалатын аймақтарды картографиялау жүйесі, археологиялық олжалар қорының құрылымы, реставрация орталығының жұмысы және металл мен керамика бұйымдарын қалпына келтірудің технологиялық әдістері таныстырылды. Алынған мәліметтер Қытай мен Қазақстанда қолданылатын әдістерге салыстырмалы талдау жүргізуге және кәсіби ынтымақтастықтың болашақ бағыттарын айқындауға мүмкіндік берді.
