Археология институтының ғалымдары Абай облысында
23 Окт 2023
2023 жылдың 18-19 қазан аралығында Ә.Х. Марғұлан атындағы Археология институтының ғалымдары Абай облысы Семей қаласына арнайы іс-сапармен барды.
Іс-сапар барысында Археология институтытының бас директоры, т.ғ.к. Ақан Оңғарұлы Семей қаласындағы іргелі оқу орны Шәкәрім университетімен және 140 жылдық тарихы бар Семей облыстық тарихи-өлкетану музейімен өзара ынтымақтастық туралы меморандумға қол қойды.
Ынтымақтастық аясында Облыстың тарихи-мәдени мұрасын зерттеуге бағытталған ортақ ғылыми жобалар мен бағдарламаларды дайындап жүзеге асыру және облыс территориясындағы археологиялық ескерткіштерді зерттеу бойынша бірлескен жұмыстар атқаруға уағдаласты. Сондай-ақ, ынтымақтастық меморандумында ескерткіштерді сақтау мен қорғау мәселесінде тәжірибе алмасу, ғылыми зерттеу нәтижелерімен бөлісу және т.б. көптеген бағыттар бойынша іс-шаралар ұйымдастыру мәселелері қамтылды.
Бүгінде Абай облысы аумағында Археология институтының ғалымдары ҚР Ғылым және жоғары білім министрлігінің Ғылым комитетінің гранттық жобасы аясында Көкентау археологиялық кешенінде ғылыми-зерттеу жұмыстарын жүргізуде.